Jahiliya to Islam, and then to Jahiliya, Is Islam on the Horizon again?

Assalamualeikum.

Nakakapanlumo ang kasalukuyang kalagayan ng aking mahal na bayan. Tigmak ng kurapsyon, kasinunglingan, kawalan ng katarungan, at halos lahat ng uri ng haram. Tuluy-tuloy ang malalaking pagsubok na ipinadadala ng Allah, swt karamihan ay bunga ng maling gawa ng aking mga kapuwa-pinoy at pati ang kalikasan ay pinalahok na rin ng Allah swt.

Sabi ng mga aklat-kasaysayan, ang  bayan ko bago dumating ang mga kastila ay naninirahan ng matiwasay, may pag-galang at may kapayapaan syempre may pagkain sa mesa ang bawat pamilya at kapit-bahayan. Tayo daw ay pinayakap sa krus sa pamagitan ng dahas-armas at matatamis na salita ng bibliya. Duon nagsimula ang pagbalik natin sa kadiliman.

Maging ang ating mga kapatid na mahigpit ang pagkapit sa Islam sa Mindanao ay unti unting nilamon ng dilim dahil sa patuloy na digmaan, kaguluhan at kahirapan.Totoong dilim o kasinungalingan lang upang sila ay siraan at wasakin sa ating pananaw? Kailan lang ba may mga sinisikil at hinuhuling balik-islam at etnikong muslim na nagdadawah ( dahil daw sa paglabag sa terorismo)?

Ilang pamilya na ba ang winasak  at nalulong sa haram dahil sa wala ang ama o ina o pareho sa tabi ng mga anak dahil kailangang mag-OFW? Ilan na ba ang Sarah Balabagan o Flor Contemplacion? Wala o karampot ang oportunidad para sa disenteng trabaho. Ilagay mo sa likod ng gumigiyagis na kahirapang ito ang katotohanan na ang Pinas ay binigyan ng Allah swt ng may pinakamaraming enerhiyang geothermal, mineral, ginto, pilak, copper, nikel, chrome, manganeze, iron ore, LNG, feldspar, limestone, dolomite, langis... at mahihilo ka sa kabalintunaan.

Maging ang ating mga pinunong muslim ay larawan na rin ng kawalang-pag-asa. Ang mga muslim ay watak-watak (daw?) sa kanilang paninindigan sa mga usaping pang-muslim.

"Noli me tangere" (Huwag mo akong salingin), tinuran ng ating pambansang bayani Gat. Jose Protacio Mercado (Rizal), dahil may sakit na kanser ang ating lipunan. Minsan parang kapanipaniwala na nagmuslim si  Dr. Rizal, dahil sa aking pananaw ay eksakto ang kanyang diagnosis, at nagsimula ito nuong 1565 AD. Mas malala na ngayon, at ang kanser na kanyang binanggit ay "jahiliya".

Malayo pa ba ang bukang-liwayway? Ano ang pwede nating gawin na kaya lang? Pagkakaisa? Pagtutulung-tulong na lumikha ng negosyo sa Muslim Area, na ang kapital, management at manggagawa ay karamihan muslim? Pag-aralin ang ating mga anak na babae (ayaw natin ng lalaking duktor na titingin sa ating asawa at anak na babae) sa Medicine, OB-Gyne, Dentista atbp?  Marahil, marami na ang mga muslim na abogado at pulitiko... baka pwede ang mga anak nating lalaki ay inhinyero, mekaniko, welder, atbp? Ano ang dapat nating unahin na kaya lang?

Nawa ay gawaran tayo ng Allah swt ng malinaw na pang-unawa, tatag ng kalooban (sabr), tunay na pagkatakot at pag-asa sa Kaniya (taqwa), gabay, at kalasag sa gitna ng mga pagsubok sa Pinas; gayundin sa ating mga pamilya, ummah at sa lahat nating mga kababayan saanman sila ngayon, na nakasalig sa Banal na Quran at Sunnah ng ating pinakamamahal na Propeta Muhammad (sumakaniya ang kapayapaan). Ameen